రాజస్థాన్ లో బిజెపికి చావుదెబ్బ


ఈ ఏడాది లోనే అసెంబ్లీ ఎన్నికలకు సిద్ధమవుతున్న రాజస్థాన్‌లో అధికార బీజేపీకి గట్టి ఎదురుదెబ్బ తగిలింది. రాష్ట్రంలో జరిగిన ఉప ఎన్నికల్లో ఆ పార్టీ చావుదెబ్బ తిన్నది. ప్రతిపక్ష కాంగ్రెస్‌ పార్టీ అనూహ్యంగా పుంజుకొని మండల్‌గఢ్‌ అసెంబ్లీ స్థానంలో విజయకేతనం ఎగరవేసింది. అలాగే అజ్మీర్‌, అల్వార్‌ లోక్‌సభ స్థానాల ఉప ఎన్నికల్లో కూడా కాంగ్రెస్‌ పార్టీ గెలిచి పరిశీలకులను సంభ్రమపర్చింది. ఈ మూడు స్థానాల్లో విజయం ఇపుడు కాంగ్రెస్‌ శ్రేణుల్లో కొత్త ఉత్సాహం నింపుతోంది. ఈ విజయంతో జైపూర్‌లోని కాంగ్రెస్‌ రాష్ట్ర ప్రధాన కార్యాలయం సంబరాలతో కోలాహలంగా మారింది. 2014 లోక్‌సభ ఎన్నికల్లో రాజస్థాన్లో కాంగ్రెస్‌ పార్టీ ఒక్క స్థానం కూడా గెలుచుకోలేదు. కాగా ఇప్పుడు ఉప ఎన్నికలు జరిగిన ఈ మూడు స్థానాలు అధికార బీజేపీవే. ఇద్దరు సిట్టింగ్‌ ఎంపీలు సన్వర్‌ లాల్‌ జాట్‌ (అజ్మీర్‌), మహంత్‌ చంద్‌ నాథ్‌ యోగి (అల్వార్‌), సిట్టింగ్‌ ఎమ్మెల్యే కీర్తి కుమారీ (మండల్‌గఢ్‌) చనిపోవడంతో ఉప ఎన్నికలు జరిగాయి. రాజస్థాన్ సీఎం వసంధరారాజే, రాజస్థాన్‌ కాంగ్రెస్‌ చీఫ్‌ సచిన్‌ పైలట్‌ ఈ రాష్ట్రంలో హోరాహోరీగా ప్రచారం చేశారు.

ముఖ్యాంశాలు
తాజా వార్తలు
​సంబంధిత సమాచారం