కోచ్‌ రమాకాంత్‌ అచ్రేకర్‌‌ ఇకలేరు


ద్రోణాచార్య, పద్మశ్రీ పురస్కార గ్రహీత, ప్రముఖ క్రికెట్‌ కోచ్‌ రమాకాంత్‌ అచ్రేకర్‌‌ (87) బుధవారం సాయంత్రం కన్నుమూశారు. ప్రపంచానికి తిరుగులేని క్రికెటర్‌ గా సచిన్‌ను తీర్చిదిద్ది అందించిన ఘనత అచ్రేకర్‌కే దక్కుతుంది. వినోద్‌ కాంబ్లి, ప్రవీన్‌ ఆమ్రె, సమీర్‌ దిఘె, బల్విందర్‌ సింగ్‌ సంధు, అజిత్‌ అగార్కర్‌ వంటి క్రికెటర్లకు కూడా ఆయన శిక్షణ నిచ్చారు. అచ్రేకర్‌కు సచిన్‌ తెందుల్కర్‌ ప్రియశిష్యుడు. ఆయనే తన మార్గదర్శకుడని సచిన్‌ ఎన్నోసార్లు చెప్పారు. ప్రతి గురుపౌర్ణమికి ఆయన ఇంటికి వెళ్లి సత్కరించేవారు. అచ్రేకర్‌ 1932లో జన్మించారు. 1943లో క్రికెట్‌ ఆడటం ప్రారంభించారు. 1945లో న్యూ హిందు స్పోర్ట్స్‌ క్లబ్‌ తరఫున ఆడారు. యంగ్‌ మహారాష్ట్ర ఎలెవన్‌, గుల్‌ మోహర్‌ మిల్స్‌, ముంబయి పోర్ట్‌కు ప్రాతినిథ్యం వహించారు. 1963-64 మొయిన్‌ద్దౌలా టోర్నీలో ఆల్‌ ఇండియా స్టేట్‌ బ్యాంకు జట్టు తరఫున హైదరాబాద్‌పై ఒక ఫస్ట్‌క్లాస్‌ మ్యాచ్‌ ఆడారు. ముంబయి శివాజీ పార్క్‌ వద్ద కామత్‌ స్మారక క్రికెట్‌ క్లబ్‌ను అచ్రేకర్‌ ప్రారంభించారు. ఎంతో మంది క్రికెటర్లకు ఆయన శిక్షణ ఇచ్చినా ఘనకీర్తి తెచ్చిపెట్టింది మాత్రం సచిన్‌ తెందుల్కర్. ప్రస్తుతం ఈ క్లబ్‌ను అచ్రేకర్‌ కుమార్తె కల్పన, అల్లుడు దీపక్‌ నిర్వహిస్తున్నారు.

ముఖ్యాంశాలు