భగవత్ ప్రీతి కలిగితే బతుకు తరిస్తుంది


(ప్రవచన విరించి బ్రహ్మశ్రీ సామవేదం షణ్ముఖ శర్మ శ్రీమద్భాగవత ప్రవచనం ఐదవ రోజు ప్రసంగం) భగవంతునిపై ప్రీతి కలిగితే జీవితం తరించిపోతుందని.. అయితే ఆ ప్రీతి కలగాలంటే ముందు భగవంతుడి విలువ తెలియాలని సమన్వయ సరస్వతి, ప్రవచన విరించి బ్రహ్మశ్రీ సామవేదం షణ్ముఖ శర్మ అన్నారు. శ్రీమద్భాగవత ప్రవచన మహాయజ్ఞంలో భాగంగా మంగళవారం రాత్రి ఐదోరోజు ప్రవచనం చేస్తూ వేద స్వరూపమే భాగవతమని స్పష్టీకరించారు. అట్టి భాగవతాన్ని చదివితే భగవంతుని విలువ తెలుస్తుందన్నారు. వేదాలు, వేదాంతమైన ఉపనిషత్తులు ఏమి చెప్పాయో అదే భాగవతం కూడా గాధా రూపంలో చెబుతుందన్నారు. అందరూ చదువుకొని తరించదగిన, చదివి తరించగలిగిన వేదంగా భాగవతం అవతరించిందని చెప్పారు. నిజానికి వేద వాక్కును విశదపరచడానికే పురాణం ఇతిహాసాదులు ఉన్నాయని.. అందుకే శ్రుతిస్మృతిపురాణాలని మనవారు కలిపే చెబుతారని వెల్లడించారు. వేదంలో పండితుడైనంత మాత్రమే పురాణ ఇతిహాసాలు అక్కరలేదనుకోవడం అవివేకమన్నారు. ఇవి మూడూ అవిభాజ్య వస్తువులనే స్పృహను పండితులు కలిగి ఉండాలని హితవు పలికారు. ఇవన్నీ ఋషులు ఇచ్చినవే గనుక ఎక్కువా తక్కువా ఉండబోదని... అలా భావించడమే పాపమని స్పష్టం చేసారు. విష్ణు జ్ఞానం ఏ రూపంలో ఉన్న కూడా అది జన్మతారకమేనని చెబుతూ విష్ణు సహస్రనామాల వైభవాన్ని ఉదహరించారు. ఇందలి నామాలను మాత్రమే కాక, ఆ నామాల వెనుక గల చోదకశక్తిని దర్శించే ప్రయత్నం చేయాలన్నారు. పద్మనాభుడి ద్వారా ఉద్భవించిన బ్రహ్మదేవుడు తన పుట్టుక గురించి ఆలోచిస్తూ ఉంటే చుట్టూ ఉన్న జలం నుంచి తప తప అనే శబ్దం వినిపించిందని.. తపించమని చెబుతున్నట్టుగా ఇది అర్థం చేసుకున్న బ్రహ్మదేవుడు తపించి పరమాత్మ అనుగ్రహాన్ని పొందాడని పేర్కొన్నారు. యోగపరమైన స్థితికి వెళ్లి యోచించడమే తపస్సు అని బ్రహ్మశ్రీ సామవేదం నిర్వచించారు. తపస్సుతో తపించకపోతే సాక్షాత్తూ బ్రహ్మదేవునికి కూడా పరమాత్మ అనుగ్రహం దొరకలేదనే సత్యాన్ని ఇక్కడ తెలుసుకోవాలన్నారు. తపస్సు, బ్రహ్మచర్యం ద్వారా పక్వమైన మనస్సుకు పరమాత్మ అందుతాడని.. భగవదనుభూతికి ప్రథమ, ప్రధాన స్థానం తపస్సు మాత్రమేనని బ్రహ్మశ్రీ సామవేదం ప్రవచించారు. బ్రహ్మదేవుడు గావించిన తపస్సుతో ప్రసన్నుడైన మహావిష్ణువ్వు విశ్వ రచన చేయాల్సిందిగా చతుర్ముఖుని ఆదేశించాడన్నారు. అయితే ఇక్కడ బ్రహ్మ కనబరచిన సంపూర్ణ శరణాగతి సర్వ మానవాళికి కూడా ఆదర్శప్రాయమన్నారు. నీ ఆజ్ఞగా భావించి విశ్వ రచన చేస్తాను.. అయితే అందుకు వలయు సమర్థతను నీవే అనుగ్రహించాలని.. సృష్టి చేస్తున్నది నేనే అన్న అహంభావం ఏ క్షణంలోనూ నాకు కలుగకుండా నీవే సర్వదా నన్ను కనిపెట్టుకోవాలి అని బ్రహ్మ పరమాత్మను ప్రార్థించాడన్నారు. అహం, మొహం నన్ను ఆవరించకుండా జ్ఞానాన్ని ప్రసాదించమని బ్రహ్మ కోరితే... దయాళువై శ్రీ మహావిష్ణువు అనుగ్రహించినదే చతుశ్లోకీ భాగవతమని తెలిపారు. ఇక్కడ బ్రహ్మ స్తుతిని, బ్రహ్మకి విష్ణువు చేసిన ఉపదేశాన్ని మనకు కూడా అన్వయించుకొంటే అసలు సత్యం తెలుస్తుందన్నారు. పరమేశ్వరుని వలన నడుస్తున్న ప్రపంచాన్ని, అందులోని ఆకర్షణలను చూసి మొహానికి లోను కాకుండా.. జగత్తు ద్వారా జగదీశ్వరుడ్ని చూడాలని, నడిచే జగత్తుని కాక నడిపించే భగవత్ శక్తిని దర్శించాలని సామవేదం వారు ఉపదేశించారు. ఈ చేస్తున్న పని నాది కాదు.. చేస్తున్నది నేను కాదనే స్పృహ, శరణాగత భావన ఉంటే సంతోషం, బాధ రెండూ ఉండవని చెప్పారు. నేను నాది అనే అహంకారాన్ని అరగదీసి.. అంతరింపజేసుకోవడమే ఆధ్యాత్మిక సాధన అని ప్రవచించారు. భగవానుడిని సన్నిహితుడని భావించి, అయన పైనే సర్వ భారం మోపి తరించే వారు ధన్యులన్నారు. ఋషులు చెప్పినది అనుభవ జ్ఞానమని, మనది అనుమాన జ్ఞానమని చమత్కరిస్తూ... అనుమాన జ్ఞానం ఉన్నవారు అనుభవజ్ఞానుల కాళ్ళు పట్టుకుంటే శ్రద్ధ కలిగి సందేహాలు తీరుతాయన్నారు. బ్రహ్మ చేసిన వినతికి ప్రసన్నమైన విష్ణువు ఆయనకు నాలుగు శ్లోకాలుగా గావించిన జ్ఞాన బోధయే చతుశ్లోకీ భాగవతం అయిందన్నారు. మొత్తం వేదాలు, సర్వ భాగవతం చెప్పిన విశేషాలన్నీనిండి నిబిడీకృతమై ఈ గంభీర శ్లోకాలను స్వయం విష్ణు వచనాలు గనుక ప్రతి ఒక్కరూ ఆరాధించి, అవధరించాలని ఉపదేశించారు. భౌతిక బుద్ధితో తెలియలేని ఆధ్యాత్మిక శాస్త్ర విషయాలను రహస్యం అంటారని చెప్పారు. ఇంద్రియాల పరిధిలో తెలిసేది ప్రకట శాస్త్రం (మెటీరియల్ సైన్స్) కాగా, ఇంద్రియాలకు అతీతంగా తెలియవచ్చేవి గుహ్య శాస్త్రాలన్నారు. గుహ్య శాస్త్రాన్ని కేవలం తపస్సు చేత మాత్రమే తెలుసుకోగలమని, ధర్మశాస్త్రాలన్నీ ఈ పరిధిలోకే వస్తాయని విశదపరిచారు. దీనికంటే పై స్థాయిలో మంత్రాన్ని గుహ్యతరమని, వేదాన్ని గుహ్యతమమని చెబుతారన్నారు. చదవడం వలన జ్ఞానం కలుగుతుందని... అనుభవానికి వస్తే అది విజ్ఞానం అనబడుతుంది అని సూత్రీకరించారు. ఇట్టి విజ్ఞానం (భగవదనుభూతి) భగవదనుగ్రహంతోనే కలుగుతుందని వక్కాణించారు. కర్మ, జ్ఞాన, ధ్యాన ఇత్యాది యోగాలన్నిటికంటే ప్రసాద యోగమే సులభము, విశిష్టము అని శివపురాణంలో చెప్పిన మాటను ఇక్కడ సామవేదం గుర్తు చేసారు. భగవంతునిపై ప్రీతి తో ధర్మాచరణ చేయాలన్నారు. అది కూడా భగవానుడిని దగ్గర చేసే కర్మలను ఆచరించాలన్నారు. సంపూర్ణ విశ్వాసంతో నమ్మవలసినది ఆశ్రయించవలసినది దైవాన్నే తప్ప మరొకటి కాదనే సత్యాన్ని చాటే అనేక సంక్లిష్ట సిద్దాంతాలను అత్యంత సులభ ఉపమానాలతో, మనసును ఆకట్టుకునే సమన్వయాలతో సామవేదం వారు తేటతెల్లం గావించారు. కార్య కారణ సృష్టికి ముందు ఉన్నదీ నేనే.. నా మాయయే సృష్టి అని భగవానుడే చెప్పిన సంగతి మరువరాదన్నారు. సృష్టికి ముందు పరమాత్మ ఉన్నాడని.. సృష్టిలోనూ ఉన్నాడని.. సృష్టి లయించిపోయాకా కూడా ఆయనే మిగిలి ఉన్నాడని.. అట్టి ఆదిమధ్యాంతరహితుడైన అనాది పురుషుడినే ఆశ్రయించాలని సిద్ధాంతీకరించారు. ఇంద్రజాలికుని మాయావిద్య నిజమని భ్రమించే అనేకమందిలో చేరిపోకుండా.. ఇదంతా ఇంద్రజాలికుని ప్రతిభ అని తెలుసుకుని వినోదించే కొందరిలా ఉండాలని.. ఈ ప్రాపంచిక మెరుగులు, మాయలు అన్నీ భగవంతుడి మాయలే అని గుర్తించి వినోదించేవారే జీవన్ముక్తులని తెలిపారు. ఆత్మగత సంస్కారాన్ని, చైతన్యాన్ని బట్టి ప్రపంచం ఒక్కొక్కరికీ ఒక్కోలా కనిపిస్తోందన్నారు. దీనినే ఆభాస, తమస్సు అంటారని.. శాస్త్రం ప్రకారం వీటినే విక్షేపం, ఆవరణ అంటారని చెప్పారు. ఆభాస లేదా విక్షేపానికి అర్థం ఒకటి ఇంకొకటిలా కనిపించడం అయితే... తమస్సు లేదా ఆవరణానికి అర్థం అసలు తెలియకపోవడం అన్నారు. భగవత్ ప్రీతి, సదాచారణ ద్వారా ఈ అజ్ఞాన దశను దాటి జ్ఞానాన్ని పొందవచ్చన్నారు. బ్రహ్మజ్ఞానం పొందితే అంతటా అదే ఉన్నదని తెలుస్తుందని.. ఆత్మజ్ఞానం కలిగితే నీవే ఆ చైతన్యమని గ్రహిస్తావని అంటూ అదే అహం బ్రహ్మాస్మి అని స్పష్టం చేసారు. నేను అనే వస్తువు ఉన్నప్పుడే కల, మెలకువ అనే రెండు దశలు ఉన్నాయని.. ఆ నేను లేకుంటే ఈ రెండూ లేవు కనుక.. అసలు నేను అంటే ఏమిటో తెలుసుకునే తపనే ఆత్మజ్ఞానాన్ని కలిగిస్తుందన్నారు. జ్ఞానం సులువుగా వచ్చేది కాదని.. భగవానుడి కాళ్ళు పట్టి వేడుకుంటూ.. అమిత తపస్సు చేస్తే తప్ప అది లభించదని వెల్లడించారు. అన్నిటా ఉన్నాను కానీ వీటిలోనూ నేను లేను అని.. నాయందు సర్వ భూతాలు ఉన్నా.. వాటి వేటిలోనూ తాను లేనని, అవి ఏవీ తనలో లేవని ఉపనిషత్తులు, భగవద్గీత, భాగవతం వినిపించిన పరమాత్మ వచనానికి సులభ వ్యాఖ్యానం గావిస్తూ సద్గురువులు సామవేదం మట్టి కుండ ఉదాహరణను చెప్పారు. కుండలో కర్పూరం వేసినపుడు అందలి గాలికి కర్పూరపు పరిమళం వ్యాపిస్తుందని.. ఇక్కడ కుండను శరీరంగా, మనసును కర్పూరంగా, గాలిని ఆత్మగా భావిస్తే ఆంతర్యం అర్థం అవుతుందన్నారు. భక్తి జ్ఞానం అయితే భగవంతుడు ఆత్మలోనే లభిస్తాడని సూత్రంగా విశదపరిచారు. సాధన చేత సమాధి స్థితిలో చెక్కు చెదరకుండా తపస్సులో కూర్చోమని విష్ణువు బ్రహ్మకు చెప్పాడని.. అట్టి సాధన చేత బుద్ధిలో కలిగే మార్పే సత్య దర్శనమని ఇక్కడ గ్రహించాలన్నారు. ఆకారం చేత మట్టి కుండగా కనిపిస్తున్న పాత్రలో ఎలాగైతే మట్టి మాత్రమే ఉన్నదో.. ఆకారం చేత ప్రపంచంగా కనిపిస్తున్న ఈ సృష్టిలో భగవానుడే ఉన్నాడని ఆయన ప్రతిపాదించారు. ఎన్నో ఆకర్షణలతో పరిభ్రమించే ఈ ప్రపంచ వికారాలకు లోనవకుండా ఏది దీనిని తిప్పుతున్నదో ఆ ఇరుసును పట్టుకుని.. ప్రపంచంతో పాటు తిరగకుండా ఇరుసుపై నిలిచి .. విశ్వ భ్రమణాన్ని సాక్షీభూతులుగా చూడడం తెలుసుకోవాలని అదే జీవన్ముక్తికి నిర్వచనం అని చెప్పారు. సద్ వస్తువుల గుణరూప కర్మలే అవతార వైభవాలని.. వాటి వేదికే భాగవతమని చెప్పారు. భాగవతానికి పది లక్షణాలను చెప్పారని.. వాటిలో మొదటి తొమ్మిది లక్షణాలు పడవ లక్షణం కోసమే చెప్పబడినాయని.. విజ్ఞులైనవారు పదీ తెలుసుకున్న తరువాత మొదటి తొమ్మిదింటినీ విడిచిపెట్టేసి పదవ అంశాన్ని స్వీకరిస్తారని వెల్లడించారు. అయితే ఆ పదవ దాని కోసమై అన్నిటినీ తెలుసుకోవడం మాత్రం అనివార్యమని అంటూ.. పండులోపల తొనలో ఉన్న రసం కోసం ఎలాగైతే దాని చర్మం తీసి, తొనలు వలిచి, గింజలు తొలగించి శుద్ధమైన రసాన్ని తీసుకుంటారో.. అలాగే భాగవత సర్వాన్నీ అవధరించి అర్థం చేసుకోవలసి ఉంటుందన్నారు. సర్గము, విసర్గము, స్థానము, పోషణము, ఊతులు, మన్వంతరాలు , ఈశానుకథలు, నిరోధము, ముక్తి, ఆశ్రయము అనేవి భాగవత దశ లక్షణాలని.. వీటిలో మొదటి తొమ్మిది చివరిదైన ఆశ్రయం కోసమే ఉన్నాయన్నారు. సర్గము అంటే పంచభూతాలు, పంచేంద్రియాలు ఇత్యాదివని, విసర్గమనగా బ్రహ్మ విస్తరణను విస్తరిస్తుందని, స్థానములో జగత్తు దెబ్బ తినకుండా రక్షించే విధానం వివరించబడిందని, పోషణము అంటే జగద్రక్షణకు భగవానుడి అనుగ్రహం తెలిపేది అని.. ఊతులు అనగా కర్మ వాసనలను అనుసరించి నడపడం అని, మన్వంతరాలు అనగా మనువుల కాలాలు వాటి యందలి ఘట్టాల వివరణ అని, ఈశాను కథలనగా అవతారాలు, గాధలని, నిరోధమనగా నడుస్తున్న ప్రపంచాన్ని ఆపే ప్రళయమని, ముక్తి అనగా నిరోధం (ప్రళయం) తర్వాత మరల జన్మించే యోగం లేని బ్రహత్వసిద్ధుల స్థితి అని, ఇక ఆశ్రయం అంటే ఈ తొమ్మిది ఎవడి అధీనంలో, ఆశ్రయంలో నడుస్తున్నాయో వాడే అని బ్రహ్మశ్రీ సామవేదం వివరించారు. ఇక్కడ చెప్పబడిన లక్షణాల్లో మొదటి రెండు సృష్ట్టికి, తరువాతి ఐదు స్థితికి సంకేతమైతే నిరోధము లయానికి సూచిక అన్నారు. ఈ మూడు స్థితులకు ఆశ్రయమైన వాడు పదోవాడు కాగా.. వాడిని గురించి వివరించేదే దశమస్కంధమని.. అతడే శ్రీకృష్ణుడిని వ్యాఖ్యానం చేసారు.

ముఖ్యాంశాలు
తాజా వార్తలు