నారాయణమూర్తి అల్లుడికి బ్రిటన్ లో మంత్రి పదవి

ఇన్ఫోసిస్‌ సహ వ్యవస్థాపకులు నారాయణ మూర్తి అల్లుడు రిషి సునక్‌ ను బ్రిటన్‌ ప్రధాని థెరిసా మే తన మంత్రివర్గంలోకి తీసుకున్నారు. 36 ఏళ్ల రిషి గత బ్రిటన్‌ ఎన్నికల్లో ఎంపీగా విజయం సాధించారు. ఆయనకు హౌసింగ్‌, కమ్యూనిటీస్‌, లోకల్‌ గవర్నమెంట్‌ మంత్రిత్వ శాఖ బాధ్యతలు అప్పగించారు. ఈ మేరకు బ్రిటన్‌ ప్రధాని కార్యాలయం మంగళవారం రాత్రి ట్వీట్‌ చేసింది. ఈసారి మంత్రివర్గ విస్తరణలో ఎక్కువగా మహిళలకు, మైనార్టీ చట్టసభ సభ్యులకు అవకాశం కల్పించారు. 2015లో జరిగిన సార్వత్రిక ఎన్నికల్లో నార్త్‌ యార్క్‌షైర్‌లోని రిచ్‌మండ్‌ నియోజకవర్గం నుంచి రిషి సునక్‌ విజయం సాధించారు. ఆక్స్‌ఫర్డ్‌ విశ్వవిద్యాలయంలో డిగ్రీ పూర్తిచేసిన సునక్‌ లండన్‌లో ఓ పెట్టుబడి సంస్థను స్థాపించారు. అనంతరం 2014లో రాజకీయాల్లోకి వచ్చారు. స్టాన్‌ఫోర్డ్‌ బిజినెస్‌ స్కూల్‌లో సహవిద్యార్థి అయిన నారాయణ మూర్తి కుమార్తె అక్షతా మూర్తిని సునక్‌ పెళ్లి చేసుకున్నారు.

Facebook