మోదీ ముంగిట అగ్ని పరీక్ష !


ప్రధానమంత్రి నరేంద్ర మోదీకి నిజమైన సవాల్ ఇప్పుడు ఎదురైంది. మరో ఏడాదిలోపు ఎనిమిది రాష్ట్రాల అసెంబ్లీ ఎన్నికలు, ఆ తర్వాత ఆర్నెల్లలోనే దేశవ్యాప్తంగా లోక్ సభ ఎన్నికలు (లేదా వీటన్నిటినీ కలిపే నిర్వహించవచ్చు) జరగనున్న నేపథ్యంలో.. మొట్టమొదటి సారి నరేంద్ర మోదీ వ్యక్తిత్వంపై, ఆయన నిజాయితీపై దేశ ప్రజల్లో, ముఖ్యంగా ఆయనను అభిమానించే వారిలో సందేహాన్ని రేకెత్తించిన సందర్భం తలెత్తింది. ఇప్పుడు ఈ సందేహం నివృత్తి కాకపోతే దేశప్రజలు మోదీని కూడా సగటు రాజకీయ నాయకుడిగానే భావించే ప్రమాదం ఉంది. ఇంతకీ ఏమిటా అనుమానం అంటే... ఇటీవల నరేంద్ర మోదీ చెన్నై పర్యటన కు వెళ్ళినప్పుడు అనూహ్యంగా డీఎంకే అధినేత కరుణానిధిని కలసి పరామర్శించి వచ్చారు. ఇప్పుడు తమిళనాట ఉన్న రాజకీయ వాతావరణాన్ని పురస్కరించుకొని చూస్తే.. రేపటి ఎన్నికల్లో డీఎంకే తో జట్టు కట్టడానికి బిజెపి కుతూహల పడుతున్నదని.. మోదీ పరామర్శ వెనుక ఆంతర్యం ఇదేనని అప్పట్లోనే పరిశీలకులు అనుమానాలు వ్యక్తం చేసారు. అదంతా బాగానే ఉంది.. అయితే 2 జి స్పెక్ట్రమ్ కుంభకోణం కేసును విచారిస్తున్న సిబిఐ ప్రత్యేక కోర్టు ఈ కేసులో నిందితులైన అప్పటి టెలికాం మంత్రి రాజా, ఎంపీ కనిమొళి తో సహా 17 మందిని నిర్దోషులుగా ప్రకటిస్తూ తీర్పు చెప్పింది. ఇదే ఒక సంచలనం అయితే ఈ తీర్పులో న్యాయమూర్తి దర్యాప్తు అధికారుల పనితీరును ఏకి పారేయడం మరో సంచలనం అయింది. ఏడేళ్లు తాను సాక్ష్యం కోసం ఎదురు చూసినా... ప్రతి పని దినంలోనూ ఉదయం నుంచి సాయంత్రం వరకూ అందుబాటులో ఉన్నా కూడా దర్యాప్తు అధికారులు సాక్ష్యాలు సమర్పించలేకపోయారని తీర్పులో తప్పుపట్టారు. పైగా సిబిఐ అధికారులు సమర్పించిన డాక్యుమెంట్లు అసమగ్రంగా ఉన్నాయని, కొన్నింటిపై తగిన సంతకాలు కూడా లేవని వెల్లడించారు. దీనినిబట్టి ఈ కేసులో దర్యాప్తు అధికారులు తీవ్ర నిర్లక్ష్యంగా వ్యవహరించారనేది స్పష్టం అవుతోంది. యుపిఎ ప్రభుత్వ కుంభకోణాలనే ప్రచారాస్త్రాలుగా మలచుకొని గత సార్వత్రిక ఎన్నికల్లో బిజెపి దాని మిత్రపక్షాలు గెలుపొందా యనడంలో అతిశయోక్తి లేదు. దేశాన్ని నీతిమంతం చేస్తామని, నల్లధనాన్ని బయటకు తెస్తామని చెప్పిన మోదీ సర్కారు గడిచిన మూడున్నరేళ్లుగా 2 జి కేసు దర్యాప్తు విషయంలో ఐదు పైసల శ్రద్ధ కూడా ప్రదర్శించలేదు. అందుకు తీర్పే కాక, తీర్పు పాఠంలో న్యాయమూర్తి వెలిబుచ్చిన అభిప్రాయాలు కూడా తిరుగులేని నిదర్శనం. 2 జి కేసులో డీఎంకే నేతలు రాజా, కనిమొళి తదితరులు క్లీన్ చిట్ తో విడుదలైతే వచ్చే ఎన్నికల్లో తమిళనాట ఆ పార్టీకి లభించే సానుకూలత అనూహ్యం ఏమీ కాదు. తమిళ నాట నేరుగా ఏ మాత్రం ప్రభావాన్ని చూపలేని బిజెపి కేవలం పొత్తు ద్వారా మాత్రమే ఉనికిని చాటుకోగలదు. అందుకు డీఎంకే ని భాగస్వామిగా ఎంచుకోవడం వల్లనే బిజెపి ఈ 2 జి కేసు విషయంలో ఉదాసీనంగా వ్యవహరించిందా? అనే అనుమానాలు ఇపుడు పొడసూపితే అది దేశ ప్రజల తప్పు కాదు. పైగా ఆ రాష్ట్రంలో డీఎంకే కి ప్రధాన ప్రత్యర్థులుగా ఉన్న శశికళ, దినకరన్ వర్గాల ఆస్తులపై (వారి ఆస్తులపై మాత్రమే) ప్రత్యేకంగా జరిగిన ఐటీ దాడులు కూడా కేంద్ర సర్కారు వ్యవహార సరళి వెనుక ఏదో రహస్య అజెండా ఉందన్న అనుమానాలు రేకెత్తించింది.

దేశంలో ఇంతవరకూ ఉన్నవి రెండే వర్గాలు. నరేంద్ర మోదీని అన్ని కాలాల్లోనూ అభిమానించే వర్గం, అన్ని కాలాల్లోనూ ద్వేషించే వర్గం! అయితే ఇంతకాలం ద్వేషించే వారికీ, వారి ప్రచారానికి విలువ అనేదే లేకుండా పోయింది. ఎందుకంటే వారివన్నీ పసలేని ఆరోపణలు, అసత్య ప్రచారాలు మాత్రమే అనే అభిప్రాయమే బ్లంగ్గా దేశంలో నాటుకుపోయింది. ఇందుకు కారణం లేకపోలేదు.. మోదీ ని విమర్శించే వారిలో అత్యధికులు కాంగ్రెస్, కమ్యూనిస్ట్ పార్టీల వాళ్ళు లేదా హిందూ వ్యతిరేకులే అవడం దీనికి ప్రధాన కారణం. మరో కారణం ఏమిటంటే వీరు ఎప్పుడు చూసినా.. మోదీ ఏమి చేసినా తప్పే అనడం తప్ప.. ప్రజా వ్యతిరేక చర్యలపై ప్రశ్నించిన వారు కాకపోవడం. అసహనం, మతవాదం అంటూ అనవసర, అసత్య ఆరోపణలు చేయడమే వీరు పనిగా పెట్టుకున్నారు. పెద్ద నోట్లను రద్దు చేసినప్పుడు, అవినీతి వ్యతిరేక, నల్లధన నిర్మూలన చర్యలు చేపట్టినప్పుడు కూడా వీరు ప్రధానిని విమర్శించారు.. అంతే కాక దేశద్రోహిగా అభివర్ణించారు. చివరికి పాకిస్థాన్ ఉగ్ర మూకలపై జరిగిన సర్జికల్ దాడులను కూడా వీళ్ళు మనస్ఫూర్తిగా అభినందించలేకపోయారు. వీరి అసత్య ఆరోపణలు చిలవలు, పలవలుగా ఇప్పటికీ కొనసాగుతూనే ఉన్నాయి. వాటిపై ఎవరికీ విశ్వసనీయత లేదు. అందుచేతనే ఎన్ని ప్రతికూల పరిస్థితులున్నా కూడా మోదీ వివిధ రాష్ట్రాల్లో తన పార్టీని అనూహ్యంగా గెలిపించగలుగుతున్నారు. ఇలాంటి పరిస్థితుల్లో తొలిసారి మోదీ వ్యక్తిత్వంపై పెద్ద సందేహాన్ని తమిళనాడు అంశం రేకెత్తించింది.

తమిళనాడులో మోదీ కరుణానిధిని పరామర్శించడం వెనుక రాజకీయం ఉందని అనలేము... అలాగే అక్కడ అక్రమ సంపదను ఐటీ శాఖ అధికారులు పట్టుకోవడాన్నీ రాజకీయం చేసి ఆరోపణలు చేయలేము. కానీ గత మూడున్న రేళ్లుగా 2 జి స్పెక్ట్రమ్ వంటి కీలక కేసు విషయంలో మోదీ సర్కారు ఏమీ చేయకపోవడాన్ని మాత్రం తప్పు పట్టి తీరాలి. ఇందులో కూడా తన ప్రమేయం లేదని ప్రభుత్వం చెప్పుకోవచ్చు.. కానీ అలా ప్రభుత్వం చెప్పినది నమ్మాలంటే ఒక్కటి జరిగి తీరాలి. దర్యాప్తులో, సాక్ష్యాల సమర్పణలో తీవ్ర నిర్లక్ష్యం వహించిన సిబిఐ అధికారులపై (కోర్టు తీర్పు ప్రాతిపదికగానే) కఠిన చర్యలు తీసుకోవాలి. ప్రభుత్వం తెగించి అలా చేయకపోతే మోదీ సర్కారు తన రాజకీయ ప్రయోజనం కోసం ఈ కేసు దర్యాప్తుని పణంగా పెట్టిందనే అనుమానం సహజంగానే తలెత్తుతుంది. కేవలం ఒక రాష్ట్రంలో తమ పార్టీ మనుగడ కోసం.. లక్షల కోట్ల ప్రజాధనం మింగేసిన వారిపై కేసును నీరు గారుస్తారని అనుకో