అవును.. లాలూ గడ్డి తిన్నాడు !

బిహార్‌లో దాదాపు ఇరవై ఏళ్లనాటి దాణా కుంభకోణం కేసులో రాంచీ సీబీఐ ప్రత్యేక న్యాయస్థానం శనివారం తీర్పు వెలువరించింది. బిహార్‌ మాజీ ముఖ్యమంత్రి, ఆర్జేడీ అధినేత లాలూ ప్రసాద్‌ యాదవ్‌తో పాటు మరో 15 మందిని ఇందులో దోషులుగా నిర్ధారించింది. మాజీ ముఖ్యమంత్రి జగన్నాథమిశ్రా, మరో ఐదుగర్ని నిర్దోషులుగా ప్రకటించింది. దోషులకు జనవరి 3న న్యాయస్థానం శిక్షలు ఖరారు చేయనుంది. 1991 - 1997 మధ్య లాలూ ప్రసాద్‌ యాదవ్‌ ముఖ్యమంత్రిగా ఉన్న సమయంలో జరిగిన ఈ దాణా కుంభకోణం 1997లో వెలుగులోకి వచ్చింది. పశువుల దాణా కొనుగోళ్ల పేరుతో కోట్ల రూపాయల అవినీతి జరిగిందని ఆరోపణలు రావడంతో లాలూ సహా మరికొందరిపై కేసు నమోదైంది. దీంతో ఆయన పదవికి రాజీనామా చేసి తన భార్య రబ్రీ దేవిని సీఎంను చేశారు. ఈ కుంభకోణానికి సంబంధించి లాలూపై ఐదు కేసులు నమోదయ్యాయి. ఇందులో ఒకటైన చైబాసా కోశాగార కేసులో ఇదివరకే లాలూ దోషిగా తేలారు. ఈ కేసులో 2013లో న్యాయస్థానం తీర్పు చెప్పింది. ఐదేళ్ల పాటు జైలు శిక్ష వేసి, లాలూ ఎన్నికల్లో పోటీ చేయకూడదంటూ ఆరేళ్ల నిషేధం విధించింది. ఆ సమయంలో రెండున్నర నెలల పాటు జైల్లో ఉన్న లాలూ తర్వాత బెయిల్‌పై బయటకు వచ్చారు. ఈ తాజా తీర్పు దేవగఢ్‌ కోశాగార కేసుకు సంబంధించినది. 1991-1994 మధ్య ఈ ఖజానా నుంచి రూ.89లక్షలు పశుదాణా పేరుతో స్వాహా చేసినట్లు ఆరోపణ. ఈ కేసులో 38 మందిపై సీబీఐ కేసు నమోదు చేసింది. విచారణ సమయంలో వీరిలో 11 మంది చనిపోగా, మరో ముగ్గురు అప్రూవర్‌గా మారారు.  మరో ఇద్దరు నేరాన్ని అంగీకరించడంతో 2006లో వారికి శిక్ష విధించారు. తాజాగా మిగిలిన 22 మందిపై విచారణ చేపట్టిన సీబీఐ ప్రత్యేక కోర్టు లాలూ సహా 15 మందిని దోషులుగా తేల్చింది. దీంతో సీబీఐ అధికారులు లాలూను కస్టడీలోకి తీసుకున్నారు. 

Facebook